Os 7 récords máis abraiantes do xadrez

Os récords inspírannos a todos para esforzarnos por chegar ao cumio. O longo legado do xadrez deixounos algúns récords que se mantiveron por décadas e outros que ben poderían durar séculos.

Velaquí sete dos récords máis abraiantes que deixou o xadrez para os anais da historia.

Serie de vitorias máis longa: o Campión do Mundo Bobby Fischer – 20 (ou 19?) partidas

Bobby Fischer, posuidor do récord mundial de vitorias consecutivas no xadrez maxistral. | Foto: Wikipedia.

Na carreira polo título que finalmente culminou no seu encontro contra Boris Spassky, Bobby Fischer gañou a extraordinaria cifra de 20 partidas contra a elite da competición. Comezou a súa serie no Interzonal de Palma de Mallorca de 1970 onde gañou sete partidas seguidas para rematar o torneo. Por mor da incomparecencia de Oscar Panno na súa partida, algúns historiadores do xadrez prefiren descontar esta partida.

Nos encontros de Candidatos que lle seguiron en 1971, Fischer derrotou a Mark Taimanov e máis a Bent Larsen por perfectos 6-0. Tras unha vitoria inicial no seguinte encontro contra Tigran Petrosian sufriu unha derrota na segunda partida, poñendo final á serie.

Fischer gañou facilmente tanto a Petrosian coma a Boris Spassky converténdose en campión do mundo de xadrez.

Mencións honoríficas:

• Campión do Mundo Bobby Fischer – 11/11 no Campionato dos Estados Unidos de América 1963-1964
• GM Fabiano Caruana – Sete vitorias na Copa Sinquefield 2014

Serie sen derrotas máis longa: o Campión do Mundo Mikhail Tal – 95 partidas

Mikhail Tal, posuidor do récord mundial de partidas maxistrais consecutivas sen ser derrotado. | Foto: Wikipedia.

Mikhail Tal colleu fama polo seu estilo de ataque creativo que acadou o seu máximo esplendor no encontro polo campionato do mundo de 1960 contra Mikhail Botvinnik. Coa vitoria nese encontro, converteuse no campión do mundo máis novo da historia con 23 anos: outro récord que estivo vixente até que Garri Kasparov venceu a Anatolii Karpov en 1985 con 22.

A carreira de Tal estivo marcada polos problemas de saúde e a súa falta de regularidade pode levar a algúns a pasar por alto os seus últimos anos que foron incribles. Entre o 23 de Outubro de 1973 e o 16 de Outubro de 1974, ligou 95 partidas sen perder, un logro extraordinario que ningún xogador estivo preto de igualar.

Mencións honoríficas:

• Mikhail Tal (outra vez!) – 85 partidas entre Xullo de 1972 e Abril de 1973
• Campión do Mundo José Raúl Capablanca – 63 partidas entre o 10 de Febreiro de 1916 e o 21 de Marzo de 1924

Reinado máis longo coma Campión do Mundo: Emanuel Lasker – 27 anos

Emanuel Lasker, campión do mundo cun reinado máis longo. | Foto: Wikipedia.

Emanuel Lasker converteuse no segundo campión do mundo cando derrotou a Wilhelm Steinitz en 1894. Retivo o título até que caeu ante José Raúl Capablanca en 1921. Seguiu xogando e participando en torneos da elite nos anos 1930s. Con frecuencia faise notar que o reinado de Lasker estendeuse por mor da I Guerra Mundial que adiou os encontros previstos contra Rubinstein e Capablanca. Mesmo sen contabilizar eses anos cuestionados, o reinado de Lasker seguiría a ser claramente máis longo que o de calquera outro campión.

Mencións honoríficas:

• Campión do Mundo Garri Kasparov – 15 anos entre 1985 e 2000
• Campión do Mundo Mikhail Botvinnik – 13 anos non consecutivos entre 1948 e 1963

Maior ELO rexistrado: Campión do Mundo Magnus Carlsen – 2882

Campión do Mundo Magnus Carlsen, o xogador con máis ELO de todos os tempos. | Foto: Maria Emelianova.

Magnus Carlsen rexistrou a súa marca en Maio de 2014 nas listas da FIDE. De maneira non oficial, alcanzou mesmo os 2889 nas listas vivas de puntuación ELO. Hai quen di que coa inflación na puntuación ELO este récord non ten ningún sentido, pero a análise de Chess.com mostra que a destreza no xadrez segue a mellorar ao longo dos tempos.

No momento de escribir, só 12 xogadores superaron algunha vez unha puntuación de 2800. Carlsen foi o único xogador que se achegou aos 2900.

Mencións honoríficas:

• Campión do Mundo Garri Kasparov – 2851 en Xullo de 1999
• GM Fabiano Caruana – 2844 en Outubro de 2014

O xogador máis novo en converterse en Gran Mestre: GM Sergey Karjakin – 12 anos, sete meses

GM Sergey Karjakin, o gran mestre máis novo de todos os tempos. | Foto: Maria Emelianova.

Karjakin e, no momento da publicación, o único xogador en conseguir o título de gran mestre aos 12 anos de idade. Karjakin viviu a súa primeira experiencia en encontros de campionato cando acababa de cumprir 12 anos e serviu coma segundo de Ruslan Ponomariov no seu encontro polo campionato do mundo da FIDE contra Vasili Ivanchuk.

En 2016, Karjakin tivo a súa primeira oportunidade propia no campionato do mundo, desafiando a Magnus Carlsen. O encontro decidiuse na rolda de desempate a rápidas a favor de Carlsen despois de empatar 6-6 tras 12 partidas clásicas, gañando unha soa partida cada xogador.

Mencións honoríficas:

• Campión do Mundo Bobby Fischer – 15 anos, 6 meses, 1 día en 1958
• GM Judit Polgar – 15 anos, 4 meses, 28 días en 1991

Máis partidas simultáneas: GM Ehsan Ghaem Maghami – 604 partidas

GM Ehsan Ghaem Maghami, posuidor do récord mundial de xadrez simultáneo. | Foto: Wikipedia.

Unha exhibición de simultáneas é unha serie de partidas contra múltiples opoñentes a un tempo. Xeralmente, os opoñentes sentan en ringleira ou en círculo e o mestre dá voltas facendo unha ou varias xogadas contra cada opoñente antes de pasar ao seguinte.

Ehsan Ghaem Maghami, o nove veces campión iraniano, xogou simultáneas contra a abraiante cifra de 604 opoñentes para facerse co récord mundial de máis opoñentes simultáneos. Gañou 580 partidas, tan só 16 partidas remataron en táboas e perdeu oito nunha exhibición de simultáneas en Teherán, Irán. A exhibición tivo lugar os días 8 e 9 de Febreiro de 2011 no estadio de deportes da Universidade Shahid Beheshti.

Mencións honoríficas:

• Susan Polgar – 326 opoñentes, logrando 309 vitorias, 14 táboas, 3 derrotas en 2005
• José Raúl Capablanca – 103 opoñentes, logrando 102 vitorias, 1 táboas en 1922

Máis partidas simultáneas a cegas: GM Timur Gareyev – 48 Games

Timur Gareev, posuidor do récord mundial de xadrez a cegas. | Foto: Mike Klein.

Unha das máis salientables fazañas no xadrez é xogar unha partida a cegas. Nunha partida a cegas, o xogador non ten permitido ver o taboleiro. Os xogadores teñen que manter toda a posición nas súas cabezas e as xogadas comunícanse pola notación do xadrez. Nunha exhibición de simultáneas a cegas, o protagonista ten que manter na memoria todas as posicións a un tempo. Unha abraiante fazaña de concentración e de destreza no xadrez.

Timur Gareev estableceu un novo récord mundial neste formato nos días 3 e 4 de Decembro de 2016 cando xogou contra 48 opoñentes á vez. Colleitou 35 vitorias, sete táboas e seis derrotas. Revive a experiencia co Informe de Chess.com sobre o intento de récord mundial.

Mencións honoríficas:

• MF Marc Lang – 46 opoñentes en 2011
• GM Miguel Najdorf – 45 partidas en 1947

Inspirado para comezar a establecer os teus propios rexistros no xadrez? Crea unha conta en Chess.com e empeza a aprender xadrez agora mesmo!